台灣之旅 – 台南地獄篇

果日係2014年5月15日,台灣台南市

一朝早起身大約7點幾,出面已經曬到乜咁,琴晚12點晾果D衫都已經乾晒,件衫直頭係熱O既

今日預計行程係孔廟+早餐,然後去安平區

孔廟離旅館唔遠,行大概10分鐘左右就去到

IMG_20140515_085409

係孔廟斜對面就係台南市警察局,唔知哩個係咪舊址已經唔再用,門口鎖左無人,出面就停左幾架的士係度兜客,係咁問我要唔要搭車,我一個人點搭…

IMG_20140515_085855 IMG_20140515_092252 IMG_20140515_085916

孔廟,唔識,一個類似公園仔O既地方,入面有幾度門,有個收費區入面有D展品,完全無任何介紹,你入去睇,睇得明就明,唔明就返去練下先再黎

不過好似只係收廿五蚊,我唔同你計較咁多

IMG_20140515_091646 IMG_20140515_091223

之後就想去搵早餐食,又話附近有好多野食,邊度有呢

唔係話未開門,而係根本唔見有…

是是但但搵間開左門O既入去食

IMG_20140515_085922

就係對面行入去哩度

IMG_20140515_094214 IMG_20140515_094806

 

麻醬麵,返到香港執相先發現有豬油撈飯,早知要豬油撈飯

至於個麵,自己想像啦,我食落就覺得係一個本身個包裝寫住叫麻醬麵O既物品,加兩條菜咁

食完飯,我睇住架巴士走左上唔到,你咁準時做乜O者而家

我有諗過行路過安平,不過諗多一諗,都係算啦,買杯野飲搵個地方HEA一下等架88路公車

去到哩度,我又諗起一D野,就係去之前見一卡通個網寫住免費搭市內公車,我以為真係免費

因為本身我計過我搭捷運佢平左果D都唔夠俾張卡果100蚊,所以我諗住唔買一卡通

但後來見佢公車有得免費坐我又走去買左張,點知係台南度一上車先知中伏,原來每個月得22日係唔洗錢搭車,其他日子唔該俾錢

IMG_20140515_102322

等左半個幾鐘終於有車,係架車上面菲特都出黎涼一涼冷氣先

坐大概15分鐘車就去到下一個目的地,安平區億載金城

IMG_20140515_104956 IMG_20140515_110555

 

可能因為比較早,果時都仲係11點左右,又或者簡單D,哩個景點因為無野好睇所以無人去,我落巴士果時上面有幾個鬼佬客幾個大陸客,成車人就得我一條戊利落車,我懷疑個司機都係度恥笑我有條傻仔去哩D景點

成個停車場都無旅遊巴停係度,億載金城入面只係得兩三個大陸遊客同埋有班學生係上面

入場費好似都係50,賣紀念品果度又係賣台灣紙牌,琴日係赤崁樓又係,見佢賣果D紀念品同哩度果D差唔多

億載金城係乜?歷史我唔識,我簡單咁用我自己個感覺去解釋一下

億載金城,就即係有個地方有塊草地,有4度圍牆,上面有幾支大砲,外面有4條坑,入面灌左水

係咁上下,真係乜都無

IMG_20140515_105548

哩個特別係個玻璃罩O既係一個儲藏室,不過我點睇佢都只係一堆由磚同泥撈埋一碟O既野,你話乜就乜啦

IMG_20140515_105152 IMG_20140515_110307 IMG_20140515_105200 IMG_20140515_110054 IMG_20140515_110128 IMG_20140515_110132

其實真係無野好睇

我後來發現原來用GOOGLE MAP個街景可以直接入埋入去睇,連入場劵都唔洗買

唔止哩度,連安平古堡都得,真係吹脹

IMG_20140515_105832

其實唔係話入面無野好睇定點,而係個感覺台南市佢根本都唔重視哩D景點咁

係,佢係網上面有好多介紹好多資料,但係奈何你親自行入去睇果時你會發覺,根本就無乜野介紹牌係入面,我連佢係乜都唔知,就咁一個四方型,幾支砲,無喇

唔通你要個人一路行一路上網睇哩個古蹟係乜?我唔係歷史學家亦都唔係旅行團,作為一個背包客形式去旅行想睇下當地歷史,但就真係完全唔知佢係乜,唔止億載金城一個,而係台南好多古蹟都係咁,就算有介紹都只係好簡短咁寫幾句,絕對唔詳盡

行左一陣影下相已經唔知有乜好睇,我上網仲見人話預1到2個鐘去遊覽,佢意思係咪要包埋野餐?

IMG_20140515_110908

 

本來去台灣之前睇左台南市文化局個網頁,寫話有5個景點可以租單車,4個鐘頭50蚊,仲可以係任何一個租車點還車

咁我諗住行完億載金城就租車,然後踩到去安平古堡就還車再行埋安平區果邊

我地倒一倒帶睇返上面其中一張相

IMG_20140515_104956

請問係邊度有車可以租呢?

唔係我屈佢架喎,佢個網頁仲係度仲寫住可以租架喎

http://plan.tainan.gov.tw/bicycle/page.asp?nSub=C00000

「騎鐵馬漫遊古蹟」規劃五大古蹟景點:赤崁樓、延平邵王祠、安平古堡、安平樹屋、億載金城。無論您在哪一處租借腳踏車,可於任一處退還腳踏車。
於服務處退還腳踏車時,服務人員會登錄退還時間,若租用時間超過四小時,則多加收新台幣NT$50元整。

佢自己寫住,琴日去赤崁樓我就已經見唔到有,今日係億載金城就根本只係一塊空地做停車場

我成個台南之旅最中伏最失算就係哩度,我最計唔到就係被台南市文化局呃鳩左我,我成個計劃就被佢打亂晒,我知佢無得租我就唔會係哩度落車啦,我係上面安平區玩完行完先係果邊租車落黎唔好?就算要踩返上去都起碼仲有條安平老街行住等丫,冚家剷而家佢無得租,一係過對面間單車舖度租,但就要踩返落黎還車,周圍就乜鳩都無,除左仲有間唔知乜魚博物館,門就開左,但係無開燈,一行入去門口就放滿一排排O既貨等住賣,我見到都無膽入去,同場有兩個香港老人家都嚇走左

 

無單車,又無車

唯有用最後殺著 – 行

無題

 

GOOGLE MAP指出路線只有唔到2公里,以我腳力好小兒科

本來應該係咁O既

PANO_20140515_112813

IMG_20140515_112437 IMG_20140515_112755 IMG_20140515_113021

我當行到林默娘公園果度,個天突然落大雨,係好大雨,我就一條友拎住把遮係行雷閃電加暴雨之下行過去安平老街

IMG_20140515_113656

 

就算落大雨,漁人碼頭個景色都係唔錯

一路行一路濕,隔離馬路上面D電單車見到我就好似見到個傻仔咁,後面都無乜心機影相IMG_20140515_115110

 

安平天后宮,去到終於停左雨,好多人,有幾架旅遊巴車左好多學生去

台灣D學生好得意,佢地件校服上面會繡左學生個名同埋學生編號上去,人多但實際入去拜天后O既人其實好少,好多都係門口果度影相,另一樣野係台灣好多地方都會有地方俾人畫繪馬掛係度,唔理係廟又好,古蹟又好,真係去到邊都會見到有

入去添左D香油錢,拜完天后

講起來又奇怪,入面D香油錢有台幣港紙人民幣唔出奇,泰珠日本紙都算喇,連美金都有人丟埋入去哩個真係估佢唔到

雖然話香油哩家野隨緣,咁但係你都唔好大餅丫,仲要人民大餅…

IMG_20140515_120832

安平古堡,係安平天后宮隔離,行幾分鐘就到,門口有好多攤野係度賣食物同紀錄品,仲有氣槍射波果D遊戲攤,十足一個小型夜市咁

IMG_20140515_120943 IMG_20140515_120959 IMG_20140515_121629 IMG_20140515_121701 IMG_20140515_122126

IMG_20140515_122512 IMG_20140515_122507

安平古堡個瞭望台,基本上可以睇晒成個安平區

安平古堡個介紹其實做得唔錯,間白色屋入面有講下歷史,又係舊時安平區模型,又有歷史短片睇下,仲有好多文物展出,全部都整得好靚好整齊,即係我覺得咁先叫一個有參觀價值O既古蹟囉…

億載金城同孔廟果D,真係呢…

可惜唔俾影相,我都估唔到我可以係入面睇哩D野睇左成個幾鐘先走,特別係個著燈果個模型,我玩左好耐

順帶一提GOOGLE街景又係可以走到入去…

IMG_20140515_124055

行完古堡,跟住條路行到乾隆海堤,轉右直行就到東興洋行,不過因為之前落雨,成個地同D檯櫈都濕晒,入面有兩間房放左D公仔同鴉片戰爭果D歷史介紹咁

至於食野真係超乎我想像咁貴,我知會貴,但估唔到可以咁貴,一杯300定200CC細德國黑啤就要130蚊定150蚊

就算去酒吧度飲都無貴到咁架…一杯仔啤酒成50蚊港紙…仲貴過係日本D居酒屋度飲

跟住路上面D指示牌行,係個十字路後行過去轉右就到安平樹屋

我一直唔知安平樹屋係乜,我以為好似老鼠樂園入面間泰山樹屋咁,係棵大樹上面有間屋

原來唔係,只係有間爛屋入面生滿左榕樹

IMG_20140515_124553IMG_20140515_125631  IMG_20140515_125822 IMG_20140515_125901

 

哩個係我哩世人入面去咁多地方見過最污糟O既景點

又臭,又多蚊蟲,唔係有蚊蟲,係直頭好似D屎坑烏蠅果種數量,係有D地方你見到D烏蠅係多到好似蜜蜂咁

入面有間賣紀念品O既舖頭,有好多驅蚊油賣,都幾識做生意,另外當然就係有台灣紙牌

你到底有幾鍾意玩台灣紙牌,邊度都有得賣

走果時我見到係樹屋入左閘之入O既地方有得租單車,我好懷疑佢就係文化局果D單車,如果唔係邊個會咁天才係入面開舖租單車?

去完樹屋就去安平區最後一個景點,夕遊出張所

我因為路牌O既關係被佢呃左我兜個大圈…

係夕遊出張所前面就係鹽神白沙灘公園

IMG_20140515_131510

 

PANO_20140515_131513

 

一個好細O既人工沙灘,無人

IMG_20140515_131647 IMG_20140515_131655

夕遊出張所,其實個名係來自日文鹽(しお)O既讀音相近,入面有好多唔同O既鹽

台南鹽好出名,包括今次無時間去O既七股鹽山

IMG_20140515_131714

真係周圍都有繪馬出現架,台南

IMG_20140515_131741

入面放左365種(定366?),代表唔同出生日期O既鹽,每一種都唔同色,唔同意思,但好多都同名

應該係一個月份一種名,然後各自有自己O既顏色同代表意思

IMG_20140515_131805

 

五月二十九日,菲特O既生日鹽

IMG_20140515_131828

 

十一月七日,我O既生日鹽

IMG_20140515_131851

一月二十一日,奈奈O既生日鹽

認真,除左奈奈果個比較準之外我唔覺得準…

IMG_20140515_132219

隔離放左個玉白菜,好巨型O既玉白菜,打爛先24萬台幣,即係6萬幾蚊港紙就有,我都有D心動想買佢返屋企

除左有生日鹽之外佢仲放左D唔同O既鹽係度俾你試食,各有唔同味道,後面有小食店賣雪糕汽水

另外仲有一個好細O既神社,不過個手水舍已經唔再用,無水加上俾人放左D雜物係上面

照習慣都去拜下,但係哩度唔係日本亦無日本紙係手,咁諗住日本放5YEN入賽錢箱咁我係台灣放5蚊囉…

唔知佢有冇特殊參拜方法,都係二參拜二拍手一參拜咁做

後來我諗一下,日本用5YEN做香油錢因為5YEN個讀音同ご縁一樣,咁5元用國語去讀咪即係無緣?

我講錯乜野先?

夕遊出張所度賣果D紀念品好特別,唔係台灣紙牌,而係鹽製品

佢仲可以俾你自己整雪鹽燒,自己燒個公仔,但係我相信我燒完未拎到返香港已經會係飛機上面解體

只係買左菲特同我自己果個生日鹽吊飾就算,100蚊台幣一個唔算貴

佢另外仲有賣好多種煮食鹽,無台灣紙牌個感覺真係好

 

睇完夕遊出張所已經3點幾

IMG_20140515_133334

 

一朝早8點幾就出動玩到而家,全身都無力,就過隔離搭2路公車返旅館

事實證明今日做得最岩O既其中一件事就係哩件,上車唔到10分鐘又落大雨,大到嚇死人

搭到好似台南醫院果邊落車就要行路返旅館,中間好似經過新光三越?我幾日都無行過入去睇,但我成日都想夜晚入去行下,但係想左兩晚都無行入去…

中間買左D野飲同野食返去當下午茶,返到去成個人都濕晒,好彩今朝有收衫咋,但係身上面哩件就唔知洗唔洗好,怕落雨唔乾

訓左陣,大概5點幾又再出動去搵食

IMG_20140515_180048

本身想去花園夜市度搵食,但係又落雨咁,雨其實好細,但都係KEEP住有幾滴咁

諗多兩諗,都係唔去夜市,唔係一陣無開門咪死?

所以就走左去另一個地方 – 海安路

果邊有好多野食,真係成條食街咁,乜都有得食,第一次去D台南食街係真係間間舖頭都有開門,真係有野食

海安路有間野好出名,叫阿明豬心冬粉,佢出名多人,而的確係好多人

但我唔明點解D人話要排隊排好耐,我都無乜點排隊,可能時間仲叫做早掛,出面買外賣就多人,入面堂食就唔多喇

入去坐底,點菜,對面搭檯個哥仔一聽我講野,就問:「香港人啊?」

喂,唔好咁啦,我知我國語講得唔好,都唔好去到邊我一講野就俾人問我係咪香港人先得架…

IMG_20140515_185737

豬心冬粉+豬肝湯=85蚊

抵食啦大佬,食落都幾好食,但我唔知點解成日都覺得,台南食咁多餐果D乜湯物湯,除左個當歸鴨湯完全唔同味之外其他D湯都好似差唔多味

即係同一個湯底,只係入面放唔同料上檯咁

食完阿明,一路繼續掃落去就梗係要食埋阿文豬心

IMG_20140515_192510

豬腳麵線+麻油腰子

哩個最令我震驚O既,係個價錢

哩度加埋要250台幣,估都估佢唔到咁貴,我上網睇人地食,料又多過我,仲食多兩三樣野都係三百幾

大佬,個豬腳麵線有幾舊骨黎架咋,人地成隻豬腳咁上,睇大細都佢嬴啦,唔通我加個麵線落去隻豬腳細D都仲收我貴D?

我見親D食評都係話平均消費100…

我食哩兩樣就250,佢又無標個價錢牌,我就只係以頭先係阿文度食兩樣都係85 O既經驗,我以為再貴都係百五蚊左右

250可以話係我係台灣食得最貴果餐,你計返港紙都貴啦…

我其實好懷疑佢係知我係香港人所以殺我一頸血

當然你可以話你落單之前做乜唔問,咁但係我唔問係一回事,佢見我係香港人所以賣貴D又係另一回事

之後我有走去搵下其他舖頭哩兩樣野係幾錢,我得出一個結論就係麻油腰子通常100~150,豬腳麵線通常4~50

我到而家我都係認為我被阿明佢昆左我

 

 

食完見個天又幾好天,就搭公車去花園夜市行下,雖然之前有D雨,但又幾熱鬧

仲大過武聖夜市,但入面呢唔知點解,好多港式乜乜港式物物咁,有D攤根本就係琴晚係武聖夜市搬黎

講返D港式乜乜,其中一個好多人買就係港式魚蛋,但問題係根本唔港式,睇樣就知道差好多

仲有就係港式飲品,其中一檔賣一樣野我覺得好神奇

叫做「凍七茶」,咩叫凍七茶,其實就即係咸檸七

IMG_20140515_212436

我都唔知關個茶字咩事,叫得凍七茶就唔好拎個檸字放中間

又有水又有七喜,仲有茶喎

你中間放個「柒」字就岩喇

味道一般,太過化學喇,我成日都覺台灣哩D飲品好多化學野,我見佢又係唔知倒左糖漿定調味劑落去,之後放兩個檸檬(唔知咸唔咸O既),再加七喜同冰

飲落就係個味道怪怪地,唔係唔似咸檸七,但個感覺就係差少少

但我都幾對唔住阿老細,佢可能哩杯野未發過市,我見佢睇個天有D想落雨都已經執野想走

我又走去買左哩杯野,佢就為左整哩杯野開左支2L七喜,我諗哩支野都等唔到聽晚就會由一支汽水變成一支糖水

賺到我40蚊,蝕左支七喜

下次用罐裝啦…

之後仲買左D烤小卷同香腸果D,又係漫長O既等車時間

我發覺搭公車果D好多都係香港人,等車時見到兩個女仔又係香港人,有對父子又係香港人…

IMG_20140515_221735

D配菜無限加,拎乜都得哩下真係幾好,當然啦佢又唔係收得平,無唔無限佢都食滑你

食完野沖完涼洗埋衫,菲特係床上面睇電視,我就執緊行李

今日估計我淨係行路都行左十幾公里,攰就唔太攰,不過曬就真係好曬,D汗出到停唔到,件衫係濕到可以扭到出水…

 

聽日,將會離開台南向高雄進發,亦令我見識到台灣軍人愛心一面

下回,台灣之旅 – 高雄軍人篇

食豆啦