第四回龍馬脱藩マラソン(下)

IMG_20151011_083300

本來打算一朝早執好野就博有冇順風車可以車我過起點果邊,不過宇都宮先生有車就搭佢果架唔洗走出去自己搵

一早起身沖個涼換好衫執好野準備好晒,食左個隔夜蜜瓜包之後就上車,去到停車場停好車,發現原來周圍都係愛媛車牌,仲多過高知,其實我仲發現有福岡車牌,我當初一個終極計劃就係搵福岡車牌嘅車睇下有冇可能搭順風車返到福岡…就算唔到福岡返到去九洲都好丫…

路程夠地獄,所以好多參賽者都唔係豆腐,唔少人個身都著住超馬比賽戰衣,我都有D後悔,點解唔帶件渣馬戰衣過日本…我係日本唯一一件陀地衫就係HKMP果場石崗30,但係30KM拎出去好似好弱雞咁

開始之前有個大會開始儀式,有好多人講野咁啦,又有村長介紹下啦,最北去到北海道,最南去到沖繩都有,係差在點解我係福岡縣而唔係香港

之後到間寛平係度搞笑啦,佢不停咁講自己跑24小時果下真係好好笑,又夠仆街,聽完佢地講野之後就走左去做熱身,輕輕跑左一個細圈就去起點等起步

中間比賽過程我無帶電話所以無影相,大概咁講就係一開始不斷咁上,中間有好多村民係路上面拎晒櫈仔坐係度幫跑手打氣,水站唔止有水同運動飲品,哩個大會一個特色就係有可樂提供,因為可口可樂係最大贊助商,另外食物都幾豐富,蕉、朱古力同鹽糖之外仲有酸梅、昆布、飯團同D我都唔知係乜嘅漬物醃菜,以一個全組別加埋千幾人參加嘅比賽黎講,已經好豐富下

頭10K都跑得幾舒服,中間有見D跑手有D特別造型,龍馬造型又有,女僕造型又有,赤腳跑都有,跑到個山谷咁地方係對面山有個阿嬸一路種菜一路幫我地打氣

到14公里左右其實哩度個排位都差唔多定左,都係差唔多排位返到去,雖然只係14公里但因為不斷向上其實都幾攰

到大概16公里左右,跑第一果個已經回緊程,簡直痴膠線,即係我跑16公里佢已經跑左26公里,但半程距離之前有4公里會連續上斜上昇320米,當中有400米係接緊爬山咁斜嘅越野賽道,都唔知佢點跑

赤腳果個我都唔知佢點跑

終於到半程前最大難關,咬住牙關細步衝上去,辛苦都唔停得,一路上一路愈來愈多人回程,有D回程跑手話仲有2K左右就上完,有希望總係好D,跑多陣終於見到越野賽道,先係200米落,然後400米上

果400米好斜我已經知,我係估唔到真係會咁斜,行都行唔到,有D位我要用手拉住先上到去…幾經辛苦完左越野賽道返到公路,大量工作人員係果度打氣,脱藩成功おめでとう咁恭喜大家脫藩成功

一上到去即刻轉返巡航MODE跑埋去折返點,因為係深山又朝早,所以好大霧,龍馬COSPLAY企左係果度同所有跑手HIGH TOUCH

9c9b9b3797f5f726f60a72d971b5d402

 

上網搵左張相,當日D霧更加濃,能見度唔夠二十米
果下真係幾感動,唔止自己超越到哩條路,更重要係後面開始落斜,好少上斜…

哩度有個奇遇,因為平時我去比賽慣左起步都係最後果班,係哩度見到川口先生就係我前面,快我少少過左折返點

前面留力留左21公里,哩度又落斜就打算快放一段路,同佢打個招呼講聲加油之後就放左佢星星

落山果下好凍,因為山上面濕度高加上太陽又照唔到,我又無帶袖套同手套,對手真係凍到我頂唔順,愈加速就愈凍咁,就係落山半路我見到有架救護車跟住一個跑友,佢應該係最後尾果個,沿路大家都幫佢打氣,我自己幫佢計過,似乎趕唔切係關門之前到中間點…但去到果度都已經好好

一直跑唔記得尾二定尾三果個水站,隔離有個類似SA咁嘅地方,見到成地都係人坐左係度,有個可能係醫生嘅人係咁俾人叫佢去睇下D跑手

洗唔洗咁誇啊…我以為再辛苦最多都係行啫,洗唔洗瞓地下…

係果個水站拎左D水淋一淋個人又繼續,一開始計劃上我帶左6包GEL,由15K開始每5K食一包,食到35K睇情況先食唔食

咁係30K果時我本身想食,但懷疑食得多過頭,肚有少少唔舒服,反而體力就唔覺有咩問題就決定唔食!哩個可以話係成場比賽最錯誤決定

36公里過完最後一個水站,成場比賽最後一個大上斜,連續1公里上斜,我跟大隊行上去,隔離有D跑手好堅持咁跑上去,我自問真係無哩個能力

上完斜準備開始跑果下,好似有報應咁,即刻開始抽筋,真係次次只要35公里打後有上斜嘅比賽就一定會同你抽兩下先滿意

開始抽就唔博啦,行多陣先,一直去到有班打氣果D學生話前面無上斜喇,我開始再跑,大概38公里左右

果時感覺都唔錯,雖然知自己已經跑到走晒樣,速度亦都唔快,但感覺還可以,一直去到大概40.5公里左右,差唔多轉返入村

我哩世人第一次跑馬跑到撞牆

我淨係知果下我突然企左係度,跑又唔係,行又唔係,就咁企左係度

我有試過再跑,唔夠兩步就差D跌,有個跑手慢慢行到我後面,問我有冇事,我話無事

之後有兩個女跑手係隔離跑過,叫我加油話仲有少少就到終點

 

如果,我有跟計畫30同35公里食包GEL,或者我無咁慘

 

我諗企左係度差唔多1分鐘,開始好D,個人都轉去爆發MODE,一野就衝落去,見人過人,個人痛又好攰又好辛苦又好都唔理,無感覺

轉到最後入村條橋果個位條右腳輕輕一抽差D成個人仆低,隔離影相D村民都問我有冇事我話無事,堅持繼續上

然後,然後就無然後喇,果個位之後到衝線前個彎位,中間發生咩事我已經唔記得左

己が限界に挑戦しよう

我淨係知最後果條直路我係一路拮住咁跑過去,仲快過我隔離果個…衝線一下,我連隔離想同我HIGH TOUCH個龍馬都唔鬼理,有兩個學生扶我埋D櫈度幫我噴冷卻噴霧

其實每次跑完都係咁,俾幾分鐘我停低係度休息就無事,所以坐左係度分零鐘我已經走左去拎張證書,拎完之後轉身見到宇都宮先生,嘩,原來佢快我足足成十幾分鐘過終點,佢仲要係50歲以上組別都跑哩個成績,佢全馬PB同我一樣

大家吹下水之後返返上去拎行李,我換完衫就去同佢一齊拎張便當劵換左個便當,另外YUSUHARA間中學有學生仲整左一大煲好好味嘅豬肉湯,凍凍地飲碗熱辣辣嘅湯真係一流,搵個地方坐低食飯,個便當都幾靚,可惜無拎電話影相,有魚有炸雞架都,仲有個橙可惜我無食

中間食飯果時有陣風吹過,我張800YEN商品劵一齊俾佢吹左去唔知邊度…都差唔多食完我都諗緊川口先生應該差唔多返到,結果望多兩望真係見到佢岩岩衝線

過去又同佢傾左幾句,佢自己都話個比賽真係好甘,跑之前都有問過佢,佢第一次跑全馬,之前練習最多都有練過30K,我就知佢30K打後一定會收檔

因為35K打後真係好地獄,無經驗係會好辛苦

大家傾左陣,講下今晚打算去邊咁,執好晒D野就走人,我同宇都宮先生都會走人,川口先生就打算留係果度一晚第二日先走

我本身打算果日搭巴士返到去須崎之後就會搭JR電車返高知,然後係高知諗辦法過一晚第二日再慢慢搭電車返福岡

不過我哩個時候有個諗法

ここは湯のまち、道後温泉なの