第四回龍馬脱藩マラソン(番外編)

IMG_20151011_145208

時間倒流返前少少,大概仲有半個幾鐘終點先關門果陣時,大會有個廣播,就話比賽仲未完,如果可以請大家一齊去終點度幫衝線嘅跑手打氣

我同宇都宮先行都落左去睇,川口先生岩岩返到就去左食飯

每次係好遠處見到有跑手轉入去,所有人都會拍手同大叫加油,哩樣係我跑咁多個比賽未見過,有跑手幫其他跑手打氣

望下個鐘,每次都諗會唔會仲有人到,佢地仲趕唔趕得切,其他跑手都估哩個人會唔會係最後一個衝線

現實好殘酷,係淨返1分鐘左右時間,離終點大概300米左右距離,有兩個跑手岩岩轉入最後大直路…

果一下我個人都忍唔住,跑過去幫佢地打氣同提佢地淨返時間唔多,但如果加油用力跑過去可能仲趕得切,終點前100米左右有條橋,佢地去到果個位時仲有20秒,但果100米對於佢地黎講真係太長太遠,始終經歷左42公里路程,最後佢地以6:00:10衝線,雖然衝線,但實際上DQ左,可惜

我果下同宇都宮先生講,佢地NET TIME其實可能係6小時以內,如果佢地起步果陣時企前啲可能就趕得切…但命運係咁就係咁,無辦法

IMG_20151011_164213

之後我本身諗住差唔多時間就去巴士站度等巴士,就同宇都宮先生同川口先生講再見,但係佢地原來都打算閃人,川口先生準備去溫泉,我以為宇都宮先生都會浸完先返歸,但原來唔係,佢係打算直接返歸

哩個時候我就問佢可唔可以車埋我去愛媛,因為當初都有諗當晚去高知過定係愛媛好,但去愛媛單靠普通電車根本去唔到松山,但又有D想去愛媛睇下

既然有咁好機會我無理由放過,宇都宮先生一下就應承左我車埋我返松山,慳返1790YEN巴士錢

中間同宇都宮先生講左好多野,有講今晚去松山有乜出名野好食,結果佢諗左好耐,竟然係諗唔到有咩出名野好食…又有講下佢個女啲野,廿四孝老豆仲特登兜路去個油站度買左張祈願火車飛俾佢

張火車飛其實係JR四國愛媛縣一個巴士站車飛,果個車站叫「ごうかく」,即係「合格」,買去到果度果張車飛就會變成「ごうかくゆき」,好多人都會去買黎祈求自己考試合格考到好成績

買完就繼續出發去松山,中途見到好多踩單車遊四國嘅人,有唔少仲一睇就知係香港人,四國果邊其實啲路都幾靚,又唔算多大車,我都想有機會去踩下

IMG_20151011_163732

中間講開佢個女,原來佢個女都好勁,係學校樂隊成員,遲啲會代表愛媛去名古屋度比賽,到時佢打算開車行超過600公里去,我話俾我真係最多開車去到岡山然後搭新幹線去好過…揸8個鐘頭車真係慘過行刑

IMG_20151011_170058 IMG_20151011_165253 IMG_20151011_172038 IMG_20151011_174235

穿過幾條隧道終於到松山,宇都宮先生本身話一唔一齊去道後溫泉,不過我仲要搵果晚落腳地方就唔好喇,叫佢係松山駅丟低我,大家就講聲再見佢就返屋企

IMG_20151011_173333

果晚窮,我第一次係日本度瞓網吧,其實鄉下地方瞓網吧都唔平架,差唔多兩千YEN先可以頂到天光,其實計唔係真係平過酒店旅館,因為通常由夜晚9點開始到第二朝5~6點先有NIGHT PACK,咁通常俾8個鐘你,即係9點開始到5點,10點開始到6點,8個鐘就2000YEN

去酒店下晝3點開始到第二朝10點先CHECK OUT,一共19個鐘,計返個價錢其實都唔係話真係差好多

不過第二朝一早5點幾趕頭班電車返福岡,都瞓唔到10點所以都係算啦,去超市買左啲野食,搵到間相對平同有得沖涼嘅網吧,都無乜心機玩,開左部機係度播浪客劍心,好似係京都大火篇,叉埋電就瞓覺

IMG_20151011_222723

網吧原來都幾多人用黎過夜,有D甚至係公開STANDARD果D座位就咁坐足一晚,我真係諗唔到佢地點頂得順…我要左FLAT SIT,即係3個長方形坐墊鋪成床咁嘅個室,因為太攰你叫我係出面頂一晚我真係頂唔到,瞓果時真係一路瞓對腳一路痛

痛個原因唔係因為跑完全程,而係俾對鞋整傷左隻左腳腳踝,又係另一個失算…

痛下又醒下咁,終於都天光,又係時候起程返福岡,執好啲野去廁所洗一洗臉就再次出發

 

果てしない夢と野望を 描き続けよう