HKMP 30km暨石崗 10K 2014

好耐無寫,難得玩左一次石崗30,哩個真係唔寫唔得

一朝早去到錦上路西鐵站,先岩岩天光

IMG_20141221_064233

搭小巴去到雷公田,落車行到入燒烤場就係起點,唔算太凍但幾乾,跑果時有出太陽

可能我太早去到,個場除左工作人員之外無咩選手係度,連拎號碼布個位都未安排好,搞到我行到入去之後又要行返出去拎個號碼布

IMG_20141221_070135

跑左咁耐,我未試過跑到場比賽係可以仆街到咁,已經唔係多斜路定點O既問題

果D叫斜路咩?一度牆斜少少叫斜路?

我仲記得一開始去到第一個水站為止都仲OK,少少上斜低唔係D乜,我仲以為一路都係咁上下程度,應該無咩太大問題,D人都係嚇鬼O既O者,正如西隧都有人話斜一樣,斜條毛咩,兩下就上左去啦

不過石崗真係被佢吹到爆,第一個水站之後果個斜,我望到果下仲以為係咪行錯路,邊有理由會跑斜到咁O既路,其實到轉彎前都唔係太長,最多就50米,但係我要抬高頭先見到頂…跑上去仲慘過跑青公過左深井之後果條上斜,已經慢到乜咁但係心跳直衝192以上

夾硬一路爬頭跑左上去,第一次跑大落斜仲差D仆左落去

5K分段時間28:16

5分半速其實比我平時跑半馬慢左好多下,有3K係KEEP到5分,但個大斜一野就抽多我分半鐘去,搞到慢晒,但係我目標其實係6分速,所以仲有少少位俾我走棧

後面直到10K位都無咩特別,有上有落但都唔係太過急果種,起碼比起前面條大斜好好多

10K分段時間57:13,比起目標仲有多左接近3分鐘

跑到12K果時我已經見到冠軍果個返緊去,果度隻錶係1:08,即係佢係哩條咁O既路仍然用3分40左右速度跑,果然專業果D係專業D

一路跑到去水庫果邊都無咩特別,基本上去到果度我覺得已經定左排位,係果度你跑幾多就係大概位置返到終點,因為我係果度跑足1K以上,我都追唔到前面果個,而後面亦都無人追到我,大家都用接近速度直線咁跑…

玩之前已經做過下功課,知道折返點之前2K係落,落完去之後要上返去,但你都無理由搞到好似秋名山玩飄移咁架?蛇形咁落一條2K長斜,仲要斜度唔低

本來落斜係應該開心,唔洗點用力就飛到落去,但係諗起一陣又要跑返上去唔知點解我又笑唔出,一直落到去懲教署個水池果度,開始果時聽個MC講好似話係特登開放俾我地跑過去做折返點

15K折返點分段時間1:26:24,平均5分43,唔算跌太多速,仍然係我目標時間(1:30)有3分半差距

但跟住上返哩超過2KO既斜先係最大問題

16、17同18哩3K個速度明顯跌到七彩,7:26、6:44同7:21

真係前面賺埋唔夠我係哩度噴,一野就將我賺到果3分半一野噴晒出去…但係無辦法,因為實在太地獄

上返水庫果邊先跑返好少少去到6:44,但係個心跳真係太高同對腳未回復到,過完水庫之後又係上斜,其實都幾絕望…

之後就好似有報應咁,頭先落咁多就上返咁多,一直到20K水站終於見到有包食

我餓左好鬼耐,因為我無食早餐,又無好似其他人咁有帶GEL,見到水站有包即刻拎返塊企埋一邊食

20K分段時間2:00:10

已經比起我目標時間慢左10秒

食包果時因為都幾趕,食一啖就想飲運動飲品灌落去,講開運動飲品就覺得大會好弧寒,15K果D加水加到好似真係飲緊水咁,係後面20同25K哩兩個水站好D

講返我想一野灌啖水落去食左塊包,包就食唔到落去,但係就哽左D麵包碎落去,搞到我係咁咳差D哽死

唔理咁多點吞左塊包,飲多杯運動飲品就上路,食左D野係唔同D,同時跑到哩度大家跑手都已經唔會點追法

我跑跑下已經去到前後都無人O既地步…

20到25都算跑得好架喇,上斜6分半,平路5分半

25K分段時間2:33:35,終於比起6分速慢左足足3分半鐘

25K左右去到河背我自問真係頂唔順,終於斜路都投降要行,因為跑上斜果時明顯感覺到右腳膝頭有唔舒服,如果只係攰,我會堅持,但只要覺得可能受傷,我就會停

我跑果時成日都問自己「痛唔痛?」「痛」,「辛唔辛苦?」「都幾」,「可唔可以繼續?」「可以」

「咁繼續」

 

20K果D斜我跑1K要6分半,25K果D斜我行1K都不過8分鐘,都差幾多

終於見返一開始無耐果條大斜,但今次係落所以真係舒服好多,跑跑下見到有個前面O既跑手可能抽筋停左係度,見到有D行山友俾野佢搽定點,我見有人關心佢咁我都唔理佢喇,如果無人我就會停低睇下佢點,因為始終係個山上面,佢出事大會D人未必知

跑下跑,25K打後分段速度

25K – 8:05
26K – 6:26
27K – 8:02
28K – 6:08
29K – 6:25
30K – 5:32

跑到大概28K果時我都幾肯定前面已經無咩斜路,所以跑得幾舒服

而且我仲見到唯一一個攝影師,都係O既,哩D山路你要人晨咁早就上山就係為左等你地幫你地影張相,仲要唔收錢,真係好難得

DSCN8488

所以我對於途中打氣果D工作人員都有幫佢地鼓掌加油,因為佢地辛苦程度唔低架,又要早過我地出發,又差唔多最後果個先走,又凍又大風

成場比賽我唯一搵到一張影到我O既相…大會終點果D得好少相,而且仲要10K果D多過30K…

見到最後1500米果個牌其實已經乜都唔理架喇,心跳幾多就幾多啦,都最後喇,最緊要開心,不過哩個衝線真係好過癮

因為前面又無人,後面又無人,衝線果時得自己一個O既比賽真係未試過,左右兩邊都有D工作人員拍手同叫加油,個感覺好唔同

最後大會時間3:06:34,晶片時間3:06:01

無題

 無題

GPS時間3:05:42,計埋時間同距離誤差,都唔差得幾多啦

哩條賽道真係好地獄,但玩落都幾好玩,有機會都會再玩多次!